◎徐建亚
早先头东庙巷里的“经畲堂”是过去生产街开会念报纸的地方。宜兴初解放辰光宜城镇设八个居委一个村，俗话“八街一村”，生产街是其中之一。生产街在长桥南面，经畲堂里还做过一向街政府。个辰光街道居委主任不叫主任，叫“街长”，居委会叫“街政府”。城里的街道居民工作都做着闹热到不得了，而且都你追我赶。你做着好老，我争取做着比你还要好。生产街的“读报”做着特别好。初解放辰光各种中心工作还有“运动”比较多，都要组织居民学习，组织开会，开会前头都要先念念报纸，听听党的声音。生产街开会一般都在储家的经畲堂，因为个边薮在大，地方宽敞，又在生产街当中段里，大家走过来都方便老。会开着比较多，有辰光日里开，有辰光夜里开，有个辰光夜里还要办办扫盲班。当时么主要有抗美援朝运动，还有镇压反革命运动，大张旗鼓宣传《婚姻法》，再加上扫除文盲运动等等。开会念报纸主要是念个般内容。个么街道里开会前头要念报纸，总归要寻个识字佬来得，还要有点积极性的人。后来，街道干部寻来寻去寻到经畲堂往东，周王庙隔壁个朱家的丫头，芳名“华轩”，当时还是个细大小娘。勿要看她细即阁落样老，她倒是私立学堂精一中学毕业的，文化高老啊。好老，个么就请她来读报。反正念念报纸都是尽尽义务的，又勿拨铜钿她。个辰光开会么总是居民小组长一家一家去通知，有辰光还要赶过去讴得。居民小组长有羊组长啊，王组长啊，都起劲到不得了。为底？因为街里领导同着报纸上讲的，居民工作也是建设新中国。
经畲堂靠好着大茶局巷，西面还有路家的老屋。经畲堂大门口有一对石马，做官佬人家用的大老的“凸銮老”石马。走过门堂屋，里头有个明堂，还有一口井。经畲堂上头有一块大匾， “经畲堂”三个字高高在上。介头有人还叫它“储家祠堂”，本来就是念书的地方。总讲过去“考状元”辰光，姓储佬家里“五凤齐飞”，有学问，子孙兴旺。经畲堂是三开间的大屋，当中还有四根柱脚，蛮粗样老。初解放辰光经畲堂里已经住着好几家人家咧。每到开会，居民家一般自家带凳，带的凳一般小凳多。但有些人就到住在经畲堂的人家家里去借凳，省着带咧。所以每到开会，住在经畲堂里的羊阿姨她家的凳总是要端光着得。羊阿姨是居民小组长，街道工作的积极分子，这人胖墩墩、福得得的样范，总是笑眯堂堂，一团和气。个辰光羊阿姨就出名老咧，难怪人家都到她家里去借凳坐。
走进经畲堂的大屋里，有个“主席台”，其实就是放几张骨牌凳或者长凳，有辰光放张台子，柱脚上有辰光会拉条横幅。生产街个辰光有个“袁街长”，一个细个头女佬，总是清清爽爽的样范。还有一个是派出所的朱同志，个辰光他还是个小伙子。过去，派出所还分管街道工作。居民开会，一般都老个老，小个小，妇女多。小佬一般是女佬带来的。家里的青壮年么要出去做生活的。一到开会这个会场里头是闹热到不得了。女佬碰到一堆来总归有讲勿断头的空话、闲话。俗话叫一个嬷嬷不吱不呱，两个嬷嬷唧咧呱落，五个嬷嬷阵头开花，十个嬷嬷开河筑坝。这个经畲堂的会场里头何止十个嬷嬷。还有扎鞋底的扎鞋底，织头绳的织头绳。同去的小佬，呒不几个会敕吱没声样老，不是歇列索落痴皮，就是出进赛可出会个跑长带。大人么了督架叫，你好歇歇否才，一直“掉双忙”样掉啊。还有人声音蛮大样老监忌细佬，你家井边头勿要开啊。开会辰光男佬一般欢喜忽壁坐，女佬欢喜靠着柱脚坐，年纪大点个人就坐当中点。细伢伲不是叫他家表淡头么就是叫老侄官，个班小佬有辰光掩在大门口。
到袁街长、朱同志他家进来招呼大家，大家就晓则会议要开始快了。袁街长是邮电局的职工家属，街道干部中能力不错，开会竟还会讲讲得。总归是先请小朱读报。会场上到小朱姑娘念报纸么就基本静下来着了。小朱念起报纸来口齿清楚，还有声有色，头一两回么可能还有点紧张，后手来么就完全进入角色老咧。生产街的居民都称赞这细丫头的报纸念则好老，而且是一口宜兴话，就是大家都听则懂老，而且大家听着清清爽爽。怪勿知道大家都要表扬念报纸佬咧。有一回则，正当念报纸辰光，闸麦替头，一个女佬“啊哟喂”样一声，声音响到则，弄到着会场上一阵啰唣。原来是这位女同志了督扎鞋底，手指头上戴个针箍子，用力一顶，针箍子通拉咧，引线屁股戳到手指头的肉里开则咧，血还滋出来则咧，十指连心痛，一痛一叫，弄到大家都朝她望。呵呵，过去扎鞋底么告种事体么多得，先捏住着手指头，不拨它出血么一介介就好老咧。朆有多少辰光，到会场静下来就继续开会。(www.xing528.com)
后来生产街的念报纸开会还真老念出名堂来个啊。顶出名的是报纸上头登个，河南有个“唱戏佬”，为抗美援朝捐献一架飞机，所以全国人民都要来为抗美援朝捐献飞机大炮。个么生产街的居民也勿会落后呐，大家都来踊跃捐献，反正献多少又朆规定好则。有些家庭妇女本身也没有多少钞票，个么买菜铜钿就拿点出来活，或者零用铜钿就拿点出来活，都捐就捐出来则了，都积极到勿得了。还都受到上级表扬个啊。还有就是宣传《婚姻法》，生产街真老有个典型事例，宜兴城里差不多都晓着老。就是街里有个“养孝新妇”（童养媳）叫红娣，原来这家人家的小官人有病，身体勿好，对照《婚姻法》红娣就提出来要求解约，再通过街道里出面做工作。这家人家还同意老，认为自家小佬有病么就勿要开耽误别人家大小娘咧。后来红娣就从这家人家出来，没多少辰光就另外找到对象，有了自家的家庭，就过自家的日脚咧。 （本文系用宜兴方言写作）
徐建亚，无锡市作协会员，宜兴县物资局编史修志办公室负责人，《物资志》主笔。在市文广新局参加“村史村志”编写工作，出版和刊行主要著作有《宜兴县物资志》《宜兴古韵》（合编）《宜兴市志民政篇》《宜兴地名》（副主编）。
经畲堂读报
免责声明：以上内容源自网络，版权归原作者所有，如有侵犯您的原创版权请告知，我们将尽快删除相关内容。
